من يومين ثلاثة كده اتفرجت على كام دقيقة من برنامج مستضيف واحدة متخصصة بتتكلم عن حوادث قـ ـتل البنات بسبب رفضهم الجواز من شخص معين (يرفضوا شخص، فالشخص ده يقـ ـتلهم).. 

هي قالت إن الشخص ده بيكون غير سوى لإنه متربي غلط،  وإن الصح إن الأب والأم يربوا ولادهم على إنهم عادي يترفضوا، ويَتَقَبلوا فكرة إن مش كل الناس بتحبهم ومش كل الناس هتقبلهم وترحب بيهم.. 

من كام يوم شوفت حوار كان معمول مع نور الشريف بعد عرض مسلسل الحاج متولي، وواحد اتصل بالبرنامج وهاجم نور الشريف وقال له إن المسلسل سيئ جدًا، هاجمه بطريقة عنيفة لدرجة إن المذيع اعتذر لنور الشريف، بس نور الشريف بمنتهى الهدؤ قال إن الراجل من حقه يقول رأيه، وأكد إنه مش متضايق، وكان باين عليه انه متقبل الهجوم عليه عادي. 

أحمد زكي لما عمل فيلم شادر السمك طلع في برنامج وكان فيه ضيوف حاضرين اللقاء ومنهم ناس معلمين من شادر السمك، وفي واحد منهم هاجم أحمد زكي بسبب بعض تفاصيل الفيلم، وأحمد زكي حاول يوضح لك وجهة نظره، وقال له بمنتهى التواضع: أنا بسألك عشان أتعلم منك، عشان لو قدمت عمل زي ده تاني آخد بالي. 

دول فنانين كبار أسوياء عندهم قدر من الفهم، غير ممثلين تانيين بيتعفرتوا ويتنرفزوا لو حد انتقد عمل ليهم، ويرفضوا يعترفوا بالفشل أو الخطأ، وشايفين نفسهم دايما صح وإن الناس لازم تحبهم وتتقبلهم مهما عملوا.. ممثلين غير أسوياء، انتشروا قوي.