"ما حدا قلهم يطلعوا هيك طلعة"
بس كأني سمعت الدكتور الي كان عم يدرسها وطلب منها علاقة كرمال تنجح بمادتو .. قلها تطلع هيك طلعة
و الطبيب الي بالمشفى الحكومي لما طلب منو يجيب ادويتو من برا لانها غير متوفرة ... قلو طلاع هالطلعة
ووزير الكهربا لما حكى في تحسن وصارت الكهربا سبعة بلمعة قال طلعوا هيك طلعة
لما راتبك بعد سنين شغل ودراسة 100 الف وجرة الغاز ب 32500 الف فرشيدة عم تترجاك تطلع هيك طلعة
لما بينزل صاروخ عليك وبتستشهد وبتبقى عيلتك بلا سند او مدخول بيخليها تعيش حياة كريمة .... حق الرد والمؤسسات الخيرية الي شحدت على اسمك عم يقولو لعيلتك تطلع هيك طلعة
لما بتكون خريج جديد وعندك احلام تطور حالك وتشتغل وتجمع مصاري وتشتري بيت وتتزوج الي بتحبها
وتشوف الي عندو سلطة محقق احلامك قبل ما ينفطم حتى ... فأرض الواقع عم تقلك تطلع هيك طلعة
لما تكوني موظفة وعندك ولاد بدك تطعميهم وزوجك مفقود او شهيد ... شرفك عم يقلك تطلعي هيك طلعة
ولاد البلد الي شمتانين انك طلعت هيك طلعة ... عم يقولك تطلع هيك طلعة
جوع ولادك ... مرض احبابك ... رغيف الخبز الي ما بيتاكل برد الشتا .... زحمة المواصلات .... سيارات الهمر ... موبايلات الايفون ... كلشي بالبلد عم يقلنا نطلع هيك طلعة
بس في ناس سمعت وناس ما بتسترجي تسمع وناس ما عندها القدرة او الشجاعة تنفذ الي سمعتو
وناس ناطرة تطلع هيك طلعة
الله يرحم كل بريء انقتل بهالبلد سواء عايش او ميت
وعقبال ما يصبروا اهالينا على فراقنا
0 تعليقات
شاركونا بآرائكم وتعليقاتكم