التغير الكبير في شكل الفنانة شيرين والتنمر الذي تواجهه

 

من ساعة ظهور صور شيرين بعد زيادة وزنها وكعادة الشعب المصري الجميل بيطاردها في كل الصفحات عشان يتريق عليها و وزنها وشكلها بما فيهم طليقها المعنف. 

لكن الشئ اللي بيثير ذهولي تعليقات الستات اللي بيسخروا من شكلها وجسمها وبيستخدموا مصطلحات ذكورية جدا وهم بيعملوا ده والحقيقة الموضوع برضة مش مرتبط بشيرين لوحدها، نفس الستات دول في كل فرصة بيتنمروا على ستات رفيعة، وزنها زايد، طويلة، قصيرة، عندها شعر في جسمها/وشها، صاحبات البشرة السوداء الخ الخ... 

ودايما بيكون التنمر ده مبني على معايير الجمال الذكورية اللي حطها اصلا الرجالة عشان يحولوا الست من إنسان حر لكائن حي اتخلق عشان يرضي تصوراتهم ورغباتهم الجنسية زي ان الست تكون رفيعة، قصيرة، ملساء، بيضاء، شعرها ناعم وطويل. 

الفكرة ان نفس معايير الجمال دي برضة بتنفرض على الستات دول و بسبب معايير الجمال دي كل ست في هذا البلد-بما فيهم الستات دول-مضطرة تدفع عشرات أضعاف الفلوس اللي بيدفعها الراجل عشان يأمن حياته ولكن هي بتدفعها عشان تعمل ليزر وتخس وتعتني بشعرها عشان يبقا طويل وناعم و تشتري منتجات غير مألوفة للراجل ولا مضطر يضيع ثروته عليها لأنه ببساطة معفي من التفاصيل دي هو بس والمجتمع فارضينها علينا فيبقى الناتج ان فلوس الراجل في البنك كفاية تأمن حياته وانتي ثروتك الوحيدة منتجات العناية بالبشرة والبيبي ليس والسيشوار. 

وبجانب العبء الاقتصادي ده كمان العبء النفسي والتنمر والعنف المجتمعي ده هيطولك انتي كمان في وقت من الأوقات لما تولدي وترضعي، تاخدي أدوية فيها كورتيزون فتتخني، حالتك النفسية تسوء فمتقدريش تعملي خطوات العناية الخزعبلية بتاعت كل يوم وشعرك يقع، يحصلك مشكلة في هرموناتك وشعر جسمك يزيد الخ الخ وفجأة هتلاقي المجتمع اللي انتي كنتي واقفة في صفه ضد ستات تانيين بيفشخك زيهم بالضبط وتخافي تخرجي حتى من باب بيتك. 

فلو ركزتي كويس هتلاقي ان اللي العنف اللي بتمارسية على ستات زيك مطحونات بسبب المعايير دي مش هيخليكي تباني روشة ولا هخلينا نحس ان افشخ واحدة في الدنيا لأ بالعكس ده لما تلف بيكي الساقية وتبقي مكان الستات دول هتكرهي نفسك مرتين، مره عشان المجتمع بيجلدك ورافضك ومره عشان كنتي في صف المجتمع وساعدتي في تدمير حياة الستات دول.