فيك تبطّل تسألني ليش ما سألت عنّك

وتصير تسأل إنت .. عنّي ؟!


فيك تعترف لمرة إنك غلطت ألف مرة

ومتت لتقنعني بإنو الغلط منّي ؟!


فيك تفهم بإنك لما تتأخر ثانيتين بالرد عليي

بكون أنا ناطر حكيك طول اليوم ؟!




طب تقدر شي يوم .. تسمعني وبس 

بلا ما تناقش ولا تنصح ولا تعطيني مواعظ بعرفها


بتعرف إنك ما بتعرفني ؟!


شو يعني حافظ شكلي ومواعيد نومتي وفيقتي وأكلي

وشو يعني إنك حافظ أو نسيان عيد ميلادي مثلاً ؟!

فكرك هيك حافظني ؟!


يلي بيحفظ التاني ..

بيكون حافظ شو الـ بيزعله قبل شو الّلي بيضحكه


بتكون - بلا ما إحكي - عم تقدّر ظروفي


عم تقدّر التراكمات والهموم والأحلام المؤجلة

عم تقدر إني تعبت بـ صبري على التعب

مليت من مللي

تعبت ..

"تنهيدة بتوصل لـ قلبك"


عنجد تعبت ..


طب ليك ..


فيك تبطل عتب وتحضني ؟!

مش قصة حب و رومانس ومياعة



قصة احتواء ..

فيك تعلمني كيف آدم وقتا اكتفى بـ حواء ؟!

______________

يسر دولي